ഫോട്ടോപതിച്ച കേക്ക് മുറിക്കല്, അധ്യാപകരുടെ ഫോട്ടോ ഫ്രെയിംചെയ്തു നല്കല്, അപ്രതീക്ഷിത സമ്മാനം നല്കല് എന്നിങ്ങനെ ചെറിയ ക്ലാസുകളില്പ്പോലും യാത്രയയപ്പ് 'കളര്ഫുള്' ആകുകയാണ്. അതേസമയംതന്നെ, അധ്യാപകര്ക്ക് സമ്മാനങ്ങള് നല്കിക്കൊണ്ടുള്ള യാത്രയയപ്പ് ആവശ്യമുണ്ടോയെന്ന ചോദ്യവും ഉയരുന്നുണ്ട്. സമ്മാനദാനത്തോടുള്ള വിയോജിപ്പ് അധ്യാപകര്ക്കിടയിലും ഉയരുന്നുണ്ട്.
പുതിയ കീഴ്വഴക്കമനുസരിച്ച് ഒന്നാംക്ലാസ് മുതലുള്ള വിദ്യാര്ഥികള് അധ്യാപകര്ക്ക് സമ്മാനം നല്കേണ്ടിവരുന്നു. ക്ലാസ് ടീച്ചര്, പ്രഥമാധ്യാപകര്, പ്രിയപ്പെട്ട അധ്യാപകര് എന്നിങ്ങനെ ഒരു വിദ്യാര്ഥി പല അധ്യാപകര്ക്ക് സമ്മാനം നല്കുന്നു. നിരുപദ്രവമെന്നു തോന്നാവുന്ന ഈ യാത്രയയപ്പും സമ്മാനവിതരണവും രക്ഷിതാക്കള്ക്ക് സാമ്പത്തികബാധ്യതയോടൊപ്പം അസമത്വത്തിന്റെയും അപകര്ഷതയുടെയുംകൂടി വേദിയായി മാറുകയാണ്.
വിലപിടിപ്പുള്ള സമ്മാനങ്ങള് നല്കാന് കഴിയാത്ത വിദ്യാര്ഥികളിലാണ് ഏറെയും ഇത്തരം മാനസികപ്രശ്നങ്ങളുണ്ടാകുന്നത്. വിലപിടിപ്പുള്ള സമ്മാനങ്ങള് നല്കാന് ചില വിദ്യാര്ഥികളെങ്കിലും മത്സരിക്കുകയും ചെയ്യുന്നു. അധ്യാപകര്ക്കു ലഭിക്കുന്ന സമ്മാനങ്ങളില് ഏറ്റക്കുറച്ചിലുകളുണ്ടാകും. ഇത് അവര്ക്കിടയിലും അസഹിഷ്ണുത വളര്ത്തുന്നു.
നിയമം സമ്മാന വിതരണത്തിനെതിര്
കേരള വിദ്യാഭ്യാസ ആക്ടും ചട്ടങ്ങളും അധ്യാപകര് സമ്മാനം സ്വീകരിക്കുന്നതിനെക്കുറിച്ച് പറയുന്നതിങ്ങനെ: സര്ക്കാരിന്റെ മുന്കൂര് അനുവാദം കൂടാതെ, അന്യരില്നിന്ന് യാതൊരു തരത്തിലുള്ള സമ്മാനമോ പ്രതിഫലമോ പാരിതോഷികമോ പ്രത്യക്ഷമായോ പരോക്ഷമായോ തനിക്കുവേണ്ടിയോ മറ്റാര്ക്കെങ്കിലും വേണ്ടിയോ സ്വീകരിക്കുകയോ, അപ്രകാരം സ്വീകരിക്കാന് തന്റെ കുടുംബാംഗങ്ങളില് ആരെയും അനുവദിക്കുകയോ പാടില്ല. അഭിനന്ദന സൂചകമായി പുഷ്പങ്ങളോ ഫലങ്ങളോ പോലുള്ള വില തുച്ഛമായ സാധനങ്ങളോ മറ്റൊരാളില്നിന്ന് അധ്യാപകന് സ്വീകരിക്കാവുന്നതാണ്. എന്നാല് ഇപ്രകാരമുള്ള സമ്മാനങ്ങള് നല്കുന്നതിനെ നിരുത്സാഹപ്പെടുത്താന് എല്ലാ അധ്യാപകരും കഴിവതും യത്നിക്കേണ്ടതാണ്.
