കോട്ടമ്മലെ കിണറും കുന്നോളം ഓർമ്മകളും വികസനത്തിനായി വഴിമാറുന്നു.

✍️ ഗിരീഷ് കാരക്കുറ്റി 

ബ്രിട്ടൻ ഇന്ത്യ അടക്കി ഭരിച്ച കാലത്ത്, ദാഹിക്കുന്നവർക്ക് കോരി കുടിക്കാൻ കൊടിയത്തൂരിന്റെ നെടുങ്കോട്ടയിൽ കുത്തിയ പൊതു കിണർ ഏവർക്കും ആശ്രയമായിരുന്നു.  നൂറ്റാണ്ടിന്റെ സാക്ഷിക്ക്  കഥകളേറെ പറയാനുണ്ടാവും. ഇതിൻെറ ഓരത്തിരുന്ന്, സൂര്യനസ്തമിക്കാത്ത ബ്രിട്ടീഷ് സാമ്രാജ്യത്വത്തെ തുരത്തുവാൻ പടയണി ഒരുക്കിയതും, നേരംപോക്കിന് കളി തമാശകൾ പറഞ്ഞിരുന്നതും, രാജ്യം ഉറ്റു നോക്കിയിരുന്ന രാഷ്ട്രീയ സാംസ്കാരിക മതരംഗത്തെ നേതാക്കന്മാരുടെ ഉജ്ജ്വല പ്രഭാഷണങ്ങൾ കൊണ്ട് പുളകിതമായതും, ജാതിമത രാഷ്ട്രീയ സാംസ്കാരിക  സംഘടനകളുടെ പോർവിളികളും, സഹവർത്തിത്തങ്ങളും കണ്ടുമടുത്തതും, വിഎം കുട്ടിയുടെയും, സി വി എം കുട്ടി ചെറുവാടിയുടെയും, മഞ്ചേരിയിലെ ബ്ലൈൻഡ് ബ്രദേഴ്സിന്റെയും ഗാനമാധുര്യം നുകർന്നാസ്വദിച്ചതുമെല്ലാം ഇവിടമായിരുന്നു.

കൂടാതെ കമ്മ്യൂണിസ്റ്റ് പാർട്ടിക്ക് വിത്ത് പാകുവാൻ സഖാക്കൾ രായിൻ മമ്മദ് കാക്കയും,  വടശ്ശേരി അയ്യപ്പേട്ടനും ഇരുഴിഞ്ഞിപ്പുഴ നീന്തി കടന്ന്  മെഗാഫോൺ കയ്യിലെടുത്തു ബ്രിട്ടീഷുകാർ ഇന്ത്യ വിടണമെന്നും, ലോക കമ്മ്യൂണിസ്റ്റ് പ്രസ്ഥാനത്തെപറ്റിയും, കൃഷിഭൂമി കൃഷിക്കാരന് നൽകണമെന്നും , ജന്മിത്വം അവസാനിപ്പിക്കണമെന്നും ഉറക്കെ വിളിച്ചു പറഞ്ഞത് ഇവിടെ വെച്ചായിരുന്നു.

പാളയും കയറുമെടുത്ത് പള്ളിയിലേക്ക് വെള്ളം കോരുന്ന കാരക്കുറ്റി ലക്ഷംവീട്ടിലെ കോമു കാക്കയും കദീസുമാച്ചിയും ചേർന്ന് സ്കൂളിലേക്ക് നടന്നു പോകുന്ന എനിക്ക് ദാഹിച്ചപ്പോൾ കൈകുമ്പിളിൽ വെള്ളം കോരി തന്നതും , മതിയാവോളം മോന്തി കുടിച്ചതും ഓർത്തുപോവുകയാണിന്ന്.

കൊടിയത്തൂരിലെ സാംസ്കാരിക നായകൻ ഉസ്സൻ മാസ്റ്റർ തൻ്റെ തലമുടി ചുരുളിലൂടെ വിരലോടിച്ച്  ചിന്തിച്ചിരിക്കുമ്പോൾ സാഹിത്യങ്ങളും നാടകങ്ങളും പിറവിയെടുക്കുന്നത് ഇതിൻെറ ഓരത്ത് വച്ചായിരുന്നു.

പണി കഴിഞ്ഞു വൈകിട്ടല്പം സേവിച്ച് ആടികുഴയുന്നവർക്കും സ്വറപറഞ്ഞിരിക്കുന്നവർക്കും, വഴിപോക്കർക്കും അത്താണിയായിരുന്നിവിടം. എൻെറ പ്രിയ സുഹൃത്ത്  സലീമിന്റെ ജീവനെടുത്തതുമുതൽ നാട്ടുകാർക്ക് വെറുപ്പായി ഇവനോട്.

അങ്ങനെ അന്നവനെ സ്ലാബിട്ടു മൂടിയതായിരുന്നു. എന്നാൽ  മണാശ്ശേരി കൊടിയത്തൂർ ചുള്ളിക്കാപറമ്പ് റോഡിൻെറ വികസനത്തിനു വേണ്ടി കുന്നോളം ഓർമ്മകളെ വഴിയിലുപേക്ഷിച്ചു ഗ്രാമത്തിന്റെ ഓരോ വളർച്ചക്കും  മൂകസാക്ഷിയായ ഈ പൊതു കിണറിനെ ചരിത്രങ്ങൾക്ക് വഴി മാറാൻ മണ്ണിട്ട് മൂടുകയാണ് കൊടിയത്തൂരിന്റെ മുഖച്ഛായ മാറാൻ , പുതുതലമുറക്കായ് വഴിമാറുകയാണിവൻ .

നാളെ ഓർത്തിരിക്കാൻ ഒരുപാട് ഒരുപാട് ഓർമ്മകൾ സമ്മാനിച്ചു വിട പറയുകയാണവൻ.