കൊടിയത്തൂർ: മാക്കൽ കുടുംബാരോഗ്യ കേന്ദ്രത്തിൽ നിർമ്മിച്ച ശ്വാസ് ക്ലിനിക്ക് ഉദ്ഘാടനം ചെയ്ത് മാസങ്ങൾ കഴിഞ്ഞിട്ടും പ്രവർത്തനം ആരംഭിച്ചിട്ടില്ലെന്ന് ആരോപിച്ച് സിപിഐഎം പാലക്കോട്ടുപറമ്പ് ബ്രാഞ്ച് പ്രതിഷേധിച്ചു.
മാക്കൽ കുടുംബാരോഗ്യ കേന്ദ്രത്തിലെ പുതിയ ഒ.പി. ബ്ലോക്കിന്റെ സീലിങ് നീക്കം ചെയ്തിട്ട് മാസങ്ങളായെന്നും ആശുപത്രി മുറ്റത്തെ ഇന്റർലോക്ക് തകർന്ന നിലയിൽ തുടരുകയാണെന്നും സിപിഐഎം ആരോപിച്ചു. കാൽനടയായും വാഹനങ്ങളിലും ആശുപത്രിയിലെത്തുന്ന രോഗികൾ പ്രയാസം നേരിടുമ്പോഴും ഗ്രാമപഞ്ചായത്ത് നടപടി സ്വീകരിക്കുന്നില്ലെന്നും യോഗം കുറ്റപ്പെടുത്തി.
മാക്കൽ ആശുപത്രിയോടുള്ള ഗ്രാമപഞ്ചായത്തിന്റെ അവഗണന അവസാനിപ്പിച്ച് ആവശ്യമായ സൗകര്യങ്ങൾ അടിയന്തരമായി ഒരുക്കണമെന്ന് സിപിഎം ആവശ്യപ്പെട്ടു.
പാലക്കോട്ടുപറമ്പ് ബ്രാഞ്ച് സംഘടിപ്പിച്ച പ്രതിഷേധ യോഗത്തിൽ ബഷീർ കണ്ണാട്ടിൽ അധ്യക്ഷത വഹിച്ചു. ജിഷ അടുപ്പശ്ശേരി, ആലിക്കുട്ടി മാസ്റ്റർ, അനസ് ടി., ശിവൻ, പി.കെ. എന്നിവർ സംസാരിച്ചു.
Tags:
KODIYATHUR
