ജന്മനാ വലതുകൈയില്ല… പക്ഷേ ഇടതുകൈകൊണ്ട് വരച്ചത് ജില്ലാ കലോത്സവത്തിന്റെ വിജയലോഗോ! ഭിന്നശേഷിയെ അതിജീവിച്ച് റജാ നൗറിൻ നേടിയത് അഭിമാന നേട്ടം.
By: മജീദ് കൂളിമാട്
മുക്കം: ജില്ലാ സ്കൂൾ കലോത്സവ ലോഗോ രൂപകല്പനയിൽ താരമായി റജാ നൗറിൻ. നവംബർ 25 മുതൽ ഡിസംബർ 3 വരെ മുക്കത്ത് നടക്കുന്ന ജില്ലാ സ്കൂൾ കലോത്സവത്തിൻ്റെ ലോഗോ രൂപകല്പനയിൽ കാരന്തൂർ മർകസ് ഗേൾസ് ഹയർ സെക്കണ്ടറി സ്കൂൾ ഭിന്നശേഷി വിദ്യാർത്ഥിനി സി.റജാ നൗറിൻ വരച്ച ലോഗോക്ക് ഒന്നാം സ്ഥാനം. ആദ്യമായാണ് ഇത്തരം വിദ്യാർത്ഥിയുടെ ലോഗോ തെരെഞ്ഞെടുക്കപ്പെടുന്നത്. ജില്ലാ വിദ്യാഭ്യാസ ഉപഡയറക്ടർ സി എസ്. അമൃത പ്രകാശനം ചെയ്തു.
പതിനേഴോളം പേരുടെ എൻട്രികളിൽ നിന്നാണ് റജാ നൗറിന് ഒന്നാം സ്ഥാനം കിട്ടിയത്. പ്രധാനധ്യാപകൻ നിയാസ് ചോലയുടെ നേതൃത്വത്തിൽ സ്കൂൾ ആർട്ട് ക്ലബിനു കീഴിൽ നടന്നു വരുന്ന സർഗാത്മകത ഉണർത്തു പദ്ധതിയിലും മുള ദിനാചരണ പരിപാടികളിലും മറ്റും ചിത്രം വരച്ച് ഈ മിടുക്കി ശ്രദ്ധ നേടിയിരുന്നു.
ഭിന്നശേഷി വിദ്യാർത്ഥികളുടെ കഴിവുകൾ പൊതുസമൂഹത്തിന് മുന്നിൽ അടയാളപ്പെടുത്താനും അവരെ കലോത്സവത്തിന്റെ മുഖ്യധാരയിലേക്ക് കൊണ്ടുവരാനും ലക്ഷ്യമിട്ട ഈ വേറിട്ട ചിന്തക്ക് വൻ അംഗീകാരവും ലഭിച്ചു .
കലോത്സവ പബ്ലിസിറ്റി കൺവീനർ പി.സതീഷ് കുമാർ,കായികമേള റിസപ്ഷൻ കമ്മിറ്റി കൺവീനർ ഷാനവാസ്‌, ആർ ഡി എസ് ജി എ സെക്രട്ടറി ആശിഷ്, ബി ആർ സി ട്രൈനർ സുജിത്ത്, ഡി ഡി ഇ ഓഫീസ് സൂപ്രണ്ട് പി ബിജീഷ്, സെക്ഷൻ ക്ലാർക്ക് പി നൗഷാദ് അലി എന്നിവർ പ്രകാശന ചടങ്ങിൽ സംസാരിച്ചു. വെള്ളി പറമ്പ് ചോലയിൽ റഷീദ് - ഖദീജ ദമ്പതികളുടെ പുത്രിയാണ് റജാ നൗറിൻ.
